Футболдан Өзбекстан құрамасы алғаш рет Олимпиадаға жолдама алды, деп хабарлайды Sport Plus Qazaqstan.
Бұл жетістік үшін Тимур Кападзенің шәкірттеріне Индонезия құрамасымен жартылай финалда 2:0 есебімен жеңіске жету керек болды. Бірінші таймда есеп ашылмаған еді, алайда екінші таймда 68-ші минутта Хусаин Норчаев есеп ашты. 84-ші минутта Индонезия Риско Ридоның қуылуынан кейін азшылықта қалды. Екі минуттан кейін Өзбекстан екінші голды соқты - қарсылас ойыншысы Пратама Архан допты өз қақпасына жіберді.
Азия Кубогының финалына шығуы Өзбекстан құрамасына Париждегі Олимпиада ойындарына жолдама әкелді. Финалда Тимур Кападзенің шәкірттері Жапониямен кездеседі. Финал 3 мамыр күні өтеді.